അപരന്‍

മുടിച്ചോടിളക്കി നഖങ്ങള്‍
തലയോടിന്‍ വിള്ളലിലേയ്ക്ക് വിരലുകള്‍
തലനിറച്ചും പത്തി
ഹൃദയത്തില്‍ നിന്നൊരു കരം
വേരുപോലെ പടര്‍ന്ന് ശരീരം

നിലവിളിക്കുകയായിരുന്നു
അപ്പോള്‍;
മുങ്ങിത്താഴുകയായിരുന്നു
ഉറഞ്ഞുറഞ്ഞ്
തിക്കുമുട്ടി
മുളയ്ക്കുകയായിരുന്നു!

തലകുനിച്ചുനോക്കുമ്പോള്‍
ഞാന്‍ നഗ്നനാണ്.
തെരുവില്‍ ഒരുപറ്റം
ആളുകള്‍ക്കു മുന്‍പില്‍
ഇളിഭ്യനായി നില്‍ക്കുമ്പോള്‍
ഞാന്‍ പോത്തിയ
കൈകള്‍ക്കുമേലെ
പൊക്കിള്‍കുഴി തുളച്ച്
ഇഴഞ്ഞുവന്ന അവന്റെ കൈ!

മൗനം

അയ്യോ!
ഇത്രനേരം മുറുക്കിച്ചവച്ചത്
നാക്കായിരുന്നു.
തുപ്പിയത് വാക്കായിരുന്നു.
തെറിച്ച വാക്കില്‍
മഷിയിട്ടുനോക്കിയപ്പോള്‍
കഷ്ടം, കഷ്ടകാലം!