പാറ്റ്

കുതിരകളെയും

കഴുതകളെയും

കാറ്റിനെതിരേവിട്ട്

ഒരു മുറച്ചിരി

തറച്ചിരിപ്പ്.

അതായത്;

കാറ്റിനൊപ്പം പറന്നതും

തിരികെ മുറത്തില്‍

വീണതും

ഗണിക്കുമ്പോള്‍

ഏതിനെ കുതിര

ഏതിനെ കഴുത

എന്നു വിളിക്കണം?

കള്ളന്‍

വിരല്‍തുമ്പിലെ കറക്കങ്ങള്‍

പോക്കറ്റിലെ മൃഷ്ടാന്നങ്ങള്‍

പൂച്ചട്ടിയിലെ ഒളിവുകാലം

കാര്‍പ്പെറ്റു്‌ തടവ്

ഭയഭ്രമകല്‌പിത കട്ടിളപ്പടി

ആശയങ്ങളുടെ അലമാര

ആശകളുടെ മടിക്കുത്ത്.

ഇപ്പോള്‍ ഒരു താഴിനുള്ളില്‍

തല പെട്ടിരിക്കുകയാണ്‌.

"ആരെങ്കിലുമൊന്നു

വലിച്ചൂരിത്തായോ അയ്യോ!

എനിക്കിതൊന്നും

സഹിക്കാന്‍ മേലേ,,,!!!"

മൂളല്‍ മൂളല്‍ മാത്രം....!

"ഏകാഗ്രമാക്കി വച്ച

രണ്ടു്‌ മൂളലുകള്‍ക്കിടയിലെ

ചിറകടി"

പറക്കുന്നവയുടെ മാത്രം

ഹൈരാര്‍ക്കി.

ചെവികളുടെ

സൂക്ഷ്മതക്കുറവു്‌

നഷ്ടമാക്കിയ അറ്റം.

മൂളിപ്പാട്ട്‌ ഉണര്‍ന്നതും

നിലച്ചതുമായ സമയം.

ദാവീദിനും

ഗോലിയാത്തിനുമിടയിലെ

കല്ലുകള്‍.....

മൂളല്‍

മൂക്കിന്‍-

തുഞ്ചം.

കീടം,

വിമാനം;

മത്സരം.

ഇടയിലൊരു

പറവ!

ജീവിച്ചിരിക്കുന്നതിനെക്കുറിച്ചുള്ള ബദ്ധപ്പെടലുകള്‍

ഉരച്ചുകളഞ്ഞ
ജീവിതത്തിന്റെ
മുന
അക്ഷരപ്പേരില്‍
ഉരച്ചുണ്ടാക്കിയ
ജീവിതത്തിന്റെ
ഊഷരതയ്ക്കുമേല്‍
മുനയില്ലാതായപ്പോള്‍
കുത്തിവരച്ചത്..
മഷിത്തണ്ടറ്റങ്ങളില്‍
കരയുന്നവര്‍,
അടയാളങ്ങളുടെ
മറവിയടുക്കിന്‍
തെളിച്ചവരകള്‍-
കൊണ്ട്
എനിക്കുമേല്‍
യാത്രചെയ്യുന്നവര്‍,
ഞാന്‍ ജീവിച്ചതിന്റെ
ഉറപ്പുകള്‍
ഇല്ലാതാക്കും വരെ
കരയുന്നവര്‍..

പുഴകള്‍ നിറഞ്ഞു -
കവിഞ്ഞ്
ഉയരവൃക്ഷങ്ങള്‍
മൂടിപ്പോകുന്നതിന്റെ
മേല്പരപ്പില്‍
കിടന്നു നോക്കുന്നു.
ആകാശം
മേലെ അടയിരിക്കുന്നു.

മരിക്കുന്നതിനെക്കുറിച്ച്
ഇങ്ങനെയൊരാശയം.

പച്ചമുളക്

കെട്ടുപ്രായത്തിലെ
ഈ ഉള്ളുപുകച്ചില്‍;
പൊട്ടുപ്രായത്തിലേ
കിളി കൊത്തിടാത്തതിനാലല്ലേ?
ഇനി പഴുപ്പിച്ചിട്ടെന്തിന്,
ചുവപ്പിച്ചിട്ടെന്തിന്,
പൊടിഞ്ഞിരുന്നിട്ടെന്തിന്?!

ഉണക്കി സൂക്ഷിക്കാതിരിക്കാനാവാത്ത വിധം ചില സന്ദേഹങ്ങള്‍

(1)

ഈ മണല്‍ത്തരിയി-

ലൊളിച്ചിരിക്കെ
സ്വര്‍ഗ്ഗമേ
നിന്നെ ഞാനവ്വിധം

മുറിച്ചു രണ്ടാക്കി!

(2)
ഹേ മഞ്ഞുകാലമേ
നിന്റെയീ പടുവസ്ത്രം
കൊടും വേനലിന്‍‌
ചെളിമൂടിയ കയത്തില്‍
പിന്നെയുമെങ്ങനെ
പുളിച്ചുപൊന്തി.

(3)
പിടിതരാതിരിക്കാന്‍

വഴുതുമ്പോള്‍
പോക്കുവെയിലേ
പോകെപ്പോകെ-

ത്തണുവാകെയതാറിക്കാഞ്ഞ-
തിരുട്ടാകെയകം
ചെതുമ്പല്‍ മൂടുന്നു.

(4)
പിഴുതെടുത്തു
നെഞ്ചില്‍
പുണര്‍ന്നിടാന്‍‌
പുല്ലേ
നിനക്കാ
മിടിപ്പില്ല!
കാറ്റിലാടുമ്പോളത്ര
കണ്ടിരിക്കാം
നിന്റെ ഹൃദയം.

(5)
ഘടി‘യാ’കാരമേ
മണിക്കൂര്‍ സൂചിയെ
കാണുമ്പോള്‍‌ മാത്രം
വയസ്സോര്‍മ്മിക്കുന്നവനെപ്പോലെ....
അറിഞ്ഞില്ല;
ഒന്നുമറിഞ്ഞില്ല.